ຍອດສົ່ງອອກສິນຄ້າຈາກສະຫວັນ ພາກ ຄາດຈະເພີ່ມຂຶ້ນ 20% ໃນປີນີ້

ສະຫວັນ ພາກ ( SAVAN Park ) ເປັນເຂດອຸດສາຫະກໍາທົ່ວໄປທີ່ຢູ່ໃນຈຸດ C ທີ່ຂຶ້ນກັບເຂດເສດຖະກິດພິເສດ ສະຫວັນ – ເຊໂນ ເຊິ່ງໃນປີຜ່ານມາ ການສົ່ງອອກສິນຄ້າໄປຕ່າງປະເທດມີມູນຄ່າ ປະມານ 400 ລ້ານໂດລາສະຫະລັດ ແລະ ຄາດວ່າໃນປີ 2019 ຍອດສົ່ງອອກຈະເພີ່ມຂຶ້ນ 15 – 20%. ປັດຈຸບັນມີ 60 ກວ່າບໍລິສັດຕ່າງປະເທດຈົດທະບຽນໃນເຂດດັ່ງກ່າວ. ໃນນີ້, 40 ບໍລິສັດໄດ້ສ້າງຕັ້ງໂຮງງານ ແລະ ມີບາງບໍລິສັດສືບຕໍ່ຂະຫຍາຍໂຮງງານເປັນໄລຍະທີສອງ ຫຼື ສາມແລ້ວ ໂດຍສະເພາະແມ່ນການລົງທຶນຈາກຍີ່ປຸ່ນ ແລະ ເອີຣົບ.

ທ່ານ Tee Chee Seng ຜູ້ຈັດການທົ່ວໄປຂອງ ບໍລິສັດ ສະຫວັນປາຊີຟິກ ດີເວີລົບເມັນ ຈໍາກັດ (SAVAN Park) ເປີດເຜີຍຕໍ່ຜູ້ສື່ຂ່າວເມື່ອຕົ້ນເດືອນມີນາ 2019 ວ່າ: ການລົງທຶນຂອງຕ່າງປະເທດໃນສະຫວັນ ພາກ ຖືວ່າເປັນປີທີ 11 ແລ້ວ ເຊິ່ງບັນຍາກາດການລົງທຶນຂອງຕ່າງປະເທດຄຶກຄັກ ນັບແຕ່ປີ 2013 ເປັນຕົ້ນມາ ຈົນເຖິງປັດຈຸບັນ.

ມາຮອດປັດຈຸບັນນີ້, ມີບໍລິສັດທີ່ມາຈົດທະບຽນຢູ່ເຂດພວກເຮົາ 60 ກວ່າບໍລິສັດ. ໃນນີ້, 40 ກວ່າບໍລິສັດ ມາລົງທຶນສ້າງຕັ້ງໂຮງງານການຜະລິດສິນຄ້າເພື່ອສົ່ງອອກ ເຊິ່ງເຫັນວ່າບາງໂຮງງານກໍເລີ່ມຂະຫຍາຍກິດຈະການເປັນໄລຍະທີສອງ ແລະ ສາມ ໂດຍສະເພາະແມ່ນການລົງທຶນຈາກປະເທດຍີ່ປຸ່ນ ແລະ ເອີຣົບ ທີ່ຜະລິດຊິ້ນສ່ວນອຸປະກອນເຄື່ອງເອເລັກໂຕຣນິກທີ່ມີຊື່ສຽງຂອງໂລກ.

ໃນປີ 2018 ຜ່ານມາ, ຍອດສົ່ງອອກສິນຄ້າຈາກສະຫວັນ ພາກ ໄປຍັງຕ່າງປະເທດ ມີມູນຄ່າ 400 ກວ່າລ້ານໂດລາ ແລະ ຄາດວ່າປີ 2019 ຍອດສົ່ງອອກຈະເພີ່ມຂຶ້ນປະມານ 15 – 20% ຢູ່ທີ່ປະມານ 500 ລ້ານໂດລາ. ຈຸດພິເສດຂອງເຂດດັ່ງກ່າວແມ່ນເປັນເສັ້ນທາງເຊື່ອມໂຍງເສດຖະກິດຕາເວັນອອກ – ຕາເວັນຕົກ ໂດຍເຊື່ອມຈາກໄທ ຫາ ລາວ ແລ້ວອອກສູ່ ສສ ຫວຽດນາມ ຫຼື ສປ ຈີນ. ຂະນະດຽວກັນ, ສິນຄ້າຈາກຈີນ ໄປຍັງ ໄທ ຫຼື ມາເລເຊຍ ໂດຍໃຊ້ລາວເຮົາເປັນທາງຜ່ານເປັນຈໍານວນຫຼາຍ ເຊິ່ງລັດຖະບານໄດ້ມີການສ້າງຕັ້ງຈຸດພັກ ຫຼື ປ່ຽນຖ່າຍສິນຄ້າຢູ່ໃນ ຂພສ ທີ່ມີຊື່ວ່າ: “ ທ່າບົກ ” ເພື່ອເປັນຈຸດອໍານວຍ ຄວາມສະດວກເຊື່ອມຕໍ່ກ່ອນຈະໄປສູ່ປະເທດປາຍທາງ.

ທ່ານກ່າວຕື່ມວ່າ: ສໍາລັບການລົງທຶນໃນປັດຈຸບັນຖືວ່າດີສົມຄວນຖ້າທຽບໃສ່ໃນໄລຍະຜ່ານມາ ເຊິ່ງນັກລົງທຶນຈາກ ສປ ຈີນ ແລະ ບັນດາປະເທດອາຊຽນກໍມີລັກສະນະເພີ່ມຂຶ້ນ. ຂະນະດຽວກັນ ຄໍາສັ່ງເລກທີ 02/ນຍ ຂອງລັດຖະບານ ກໍໄດ້ເອົາໃຈໃສ່ເປັນພິເສດກ່ຽວກັບການບໍລິການລົງທຶນໂດຍຜ່ານປະຕູດຽວ ເຊິ່ງປັດຈຸບັນ ການອອກອະນຸຍາດທາງດ້ານເອກະສານໃນເຂດເສດຖະກິດພິເສດ ສະຫວັນ – ເຊໂນ ຖືວ່າສະດວກສະບາຍກວ່າເກົ່າ ເນື່ອງຈາກສູນກາງໄດ້ມອບໃຫ້ທ້ອງຖິ່ນເປັນຜູ້ອອກອະນຸຍາດ ອັນເປັນຜົນດີອໍານວຍຄວາມສະດວກໃຫ້ແກ່ທຸລະກິດ ແລະ ຕັດຮອນຂອດຂັ້ນຕ່າງໆ ເພື່ອປະຢັດຄ່າໃຊ້ຈ່າຍທີ່ບໍ່ຈໍາເປັນລົງ.

ທ່ານຍັງໃຫ້ເຫດຜົນທີ່ຕ່າງປະເທດສົນໃຈລົງທຶນໃນ ສະຫວັນ ພາກ ອີກວ່າ: ເນື່ອງຈາກການລົງທຶນໃນເຂດດັ່ງກ່າວຄ່າຈ້າງງານຍັງຕ່ຳ ( Low Coast ) ຫາກທຽບໃສ່ກັບປະເທດອ້ອມຂ້າງ, ຜະລິດຕະພັນຂອງເຂດເຮົາສົ່ງອອກໄປຕ່າງປະເທດກໍໄດ້ນະໂຍບາຍທາງດ້ານຫຼຸດຜ່ອນ ຫຼື ຍົກເວັ້ນພາສີ – ອາກອນນໍາເຂົ້າຕ່າງໆ ຈາກປະເທດປາຍທາງ ຈຶ່ງເປັນຈຸດເດັ່ນເຮັດໃຫ້ນັກລົງທຶນຕ່າງປະເທດສົນໃຈຂະຫຍາຍຖານການຜະລິດເພື່ອສົ່ງອອກ. ຂະນະດຽວກັນ, ກໍເປັນການສ້າງວຽກເຮັດງານທໍາໃຫ້ກັບນັກສຶກສາທີ່ຮຽນຈົບໃໝ່ນຳອີກ ໂດຍປີ 2018 ຜ່ານມາ ມີແຮງງານຈົບໃໝ່ບັນຈຸເຂົ້າວຽກປະມານ 1 ພັນກວ່າຄົນ ຈາກ 6 ພັນຄົນທີ່ສໍາເລັດການສຶກສາທັງໝົດໃນທົ່ວແຂວງສະຫວັນນະເຂດ.

ສິ່ງສໍາຄັນທຸລະກິດຂະໜາດນ້ອຍ ແລະ ກາງຂອງລາວເຮົາ ຫຼື SME ຄວນຫາໂອກາດຈາກການລົງທຶນໃນເຂດນີ້ໃຫ້ຫຼາຍ ເພາະວ່າບໍລິສັດຕ່າງປະເທດສ່ວນຫຼາຍແມ່ນຈາກຍີ່ປຸ່ນ, ເອີຣົບ ແລະ ສປ ຈີນ ລວມທັງບັນດານັກທຸລະກິດຕ່າງປະເທດທີ່ລົງທຶນຢູ່ໄທ ແລ້ວຍ້າຍຖານການຜະລິດເຂົ້າມາເຂດນີ້ກໍນັບມື້ເພີ່ມຂຶ້ນ ຖືວ່າເປັນອີກວຽກໜຶ່ງທີ່ຊ່ວຍໃຫ້ SME ລາວເຮົາໃຫ້ມີວຽກຫຼາຍຂຶ້ນ. ສ່ວນແຜນການໃນອະນາຄົດຂອງພວກເຮົາແມ່ນເນັ້ນໃສ່ສີຂຽວ ແລະ ຍືນຍົງ ເຊິ່ງຜະລິດສິນຄ້າທີ່ມີຄຸນນະພາບ ແລະ ເປັນມິດກັບສິ່ງແວດລ້ອມ ເຖິງວ່າການລົງທຶນອາດຈະຊັກຊ້າກໍບໍ່ເປັນຫຍັງ ຂໍແຕ່ໃຫ້ການລົງທຶນມີຄຸນນະພາບ ແລະ ຊ່ວຍສ້າງວຽກເຮັດງານທຳໃຫ້ກັບສັງຄົມລາວກໍຖືວ່າເປັນການລົງທຶນທີ່ດີ. “ ທ່ານ Tee Chee Seng ກ່າວ ”.

ສະຫວັນ ພາກ ( SAVAN Park ) ສ້າງຕັ້ງຂຶ້ນໃນປີ 2008 ເຊິ່ງເປັນການຮ່ວມມືກັນລະຫວ່າງ ບໍລິສັດ ສະຫວັນປາຊີຟິກ ດີເວີລົບເມັນ ຈໍາກັດ ຮ່ວມກັບລັດຖະບານລາວ ແລະ ບໍລິສັດ Pacifica Streams Development ຈາກປະເທດມາເລເຊຍ ໄດ້ລົງນາມຂໍ້ຕົກລົງ ວ່າດ້ວຍໂຄງການພັດທະນາຈຸດ C ທີ່ຂຶ້ນກັບເຂດເສດຖະກິດພິເສດ ສະຫວັນ – ເຊໂນ ເຊິ່ງເປົ້າໝາຍຫຼັກແມ່ນດຶງດູດເອົາການລົງທຶນຕ່າງປະເທດເຂົ້າມາໃນ ສປປ ລາວ ແລະ ເຮັດໃຫ້ການພັດທະນາໃນເຂດດຳເນີນໄປໄດ້ຢ່າງວ່ອງໄວ ເວົ້າສະເພາະເຂດເສດຖະກິດພິເສດ ສະຫວັນ – ເຊໂນ ໄດ້ສ້າງຕັ້ງໃນປີ 2003 ເຊິ່ງທັງໝົດແບ່ງອອກເປັນ 4 ຈຸດ ຄື: ຈຸດ A ແມ່ນເຂດອຸດສາຫະກຳ – ການບໍລິການ; ຈຸດ B ແມ່ນເຂດໂລຈິສຕິກ – ການຂົນສົ່ງ, ຈຸດ C ອຸດສາຫະກໍາທົ່ວໄປທີ່ເປັນມິດກັບສິ່ງແວດລ້ອມ ແລະ ຈຸດ D ແມ່ນເຂດທີ່ພັກອາໄສ ແລະ ອື່ນໆ ເຊິ່ງທ່າແຮງຂອງເຂດດັ່ງກ່າວແມ່ນເປັນຈຸດທີ່ຕັ້ງເສັ້ນທາງເສດຖະກິດຕາເວັນອອກ – ຕາເວັນຕົກ.

ຂ່າວ: ນສພ ເສດຖະກິດ-ການຄ້າ

loading...

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

ຫມວດຫມູ່

Copy Protected by Chetan's WP-Copyprotect.