ມິ​ນິ ເອັງ​ເຈີ​ວ່າ “ຂ້ອຍ​ບໍ່​ແມ່ນນາງ​ຟ້າ” ເດີ ຂໍ​ບອກ!

ມິນິ ເອັງເຈີ ສາວສຽງດີທີ່ເລີ່ມຕົ້ນອາ­ຊີບໃນວົງການບັນ­ເທີງດ້ວຍບົດ­ບາດການເປັນດີເຈຈັດລາຍ­ການເພງທາງຄື້ນວິ­ທະ­ຍຸ ແລະດ້ວຍຄວາມຮັກມັກໃນການຮ້ອງ­ເພງບວກກັບຄວາມຮຽກ ຮ້ອງຕ້ອງ­ການຂອງແຟນຄລັບທີ່ຢາກຟັງນໍ້າສຽງໃສໆທັງຢາກເຫັນຮູບແບບຈັບໄມຮ້ອງ­ເພງຂອງ ມິນິ ເອັງເຈີ ຈິ່ງເຮັດໃຫ້ນາງຜັນຕົວມາເປັນສິ­ລະປິນ ຊຶ່ງ ນີ້ກໍຄືຜົນ­ງານທຳອິດທີ່ມີຊື່­ວ່າ “ຂ້ອຍບໍ່ແມ່ນນາງຟ້າ” ຊິງເກິລນີ້ຈະມີອາ­ລົມ ເພງແນວ­ໃດຂໍໃຫ້ແຟນໆຕິດ­ຕາມໄປພ້ອມໆກັນ.

ພາຍໃຕ້ສັງ­ກັດຄ້າຍເພງ ທີເຄ ຊາວລາວ ຊຶ່ງສາວ ມິນິ ເອັງເຈີ ກໍໄດ້ຖ່າຍທອດບົດເພງທີ່ສະ­ທ້ອນເຖິງຄວາມຮັກໃນອີກແງ່ມຸມໜຶ່ງຂອງໄວໜຸ່ມ ເພງນີ້ປະ­ພັນມາຈາກເຫດ­ການທີ່ເກີດຂຶ້ນກັບຫຼາຍໆຄົນໃນສັງ­ຄົມປະ­ຈຸບັນ ອັນໄດ້ບອກ­ເລົ່າ ເລື່ອງລາວຂອງຍິງສາວທີ່ໄດ້ມອບ ຄວາມຮັກຄວາມຈິງໃຈໃຫ້ກັບຊາຍໜຸ່ມ ຜູ້ເປັນທີ່ຮັກໝົດຫົວ­ໃຈ ລວມເຖິງຄວາມ ໄວ້ເນື້ອເຊື່ອໃຈ  ແລະສັດ­ທາອັນແຮງກ້າ ໃນຮັກແທ້ທີ່ຄິດວ່າມັນຈະມີຢູ່ຈິງ ແຕ່ໃນ ເມື່ອຄວາມຮັກທີ່ມອບໃຫ້ໄປແຕ່ອີກຝ່າຍກັບບໍ່ຖະນຸຖະ­ໜອມ ບໍ່ເຄີຍເອົາ­ໃຈ­ໃສ່ ແລະ ປະຖິ້ມໃຫ້ຄວາມຮັກອັນບໍ­ລິ­ສຸດຕ້ອງຈືດຈາງລົງທຸກມື້ ສຸດທ້າຍຍິງສາວທີ່ເຄີຍບູຊາຄວາມຮັກກໍໝົດສິ້ນຄວາມອົດ­ທົນຕໍ່ຊາຍຜູ້ເປັນທີ່ຮັກ ຊຶ່ງມີແຕ່ຄວາມເມີນເສີຍ ຄວາມມັກ­ງ່າຍ ແລະຄວາມຫຼາຍໃຈ ດັ່ງ­ນັ້ນ ນາງຈິ່ງໄດ້ເອີ່ຍຄຳໜຶ່ງອອກມາວ່າ… ນ້ອງບໍ່ໄດ້ຫວັງຫຍັງຫາກອ້າຍຍັງບໍ່ເຫັນຄຸນ­ຄ່າຂອງຄວາມຮັກທີ່ນ້ອງມອບ ໃຫ້ນ້ອງບໍ່ໄດ້ມີນິດໄສໃຫ້ອ້າຍມາຢອກຫຼິ້ນກິນແລ້ວບິນໜີ ນ້ອງບໍ່ແມ່ນນາງຟ້ານາງເທວະດາທີ່ຈະອົດ­ທົນໄດ້ທຸກສິ່ງທຸກຢ່າງ ແລະໃຫ້ອະ­ໄພໄດ້ທຸກການກະທຳ ຖ້າຫາກມື້ໃດທີ່ອ້າຍຮູ້­ຈັກກັບຄຳວ່າພໍມື້ນັ້ນເຮົາຈິ່ງກັບມາພໍ້ກັນໃໝ່ (ຈັ່ງ­ຊັ້ນໃດ໋ບາດ­ນີ້!).

ແຟນເພງຂອງດີເຈສາວ ມິນິ ເອັງເຈີ ສາ­ມາດຕິດ­ຕາມຮັບຊົມຜົນ­ງານເພງ “ຂ້ອຍບໍ່ແມ່ນນາງຟ້າ” ໄດ້ຕາມຊ່ອງທາງຕ່າງໆເຊັ່ນ ແຟນເພຊຂອງຄ້າຍທີເຄ ຊາວລາວ ຢູທູບ  ແລະເຟສບຸ໊ກ ຫຼື ຈະໂທລະ­ສັບເຂົ້າໄປຂໍຟັງຈາກລາຍ­ການວິທະຍຸກໍໄດ້ ແລ້ວທ່ານຈະຮູ້ວ່ານາງຟ້າຍັງມີຢູ່ຈິງເທິງໂລກໜ່ວຍນີ້… (ພຸ້ນຕວາ!).

ໂດຍ: ເພັງສະຫວັນ ນສພ ວັນອາທິດ

ຄລິບຈາກ: Mini Xaisavath

loading...

1 thought on “ມິ​ນິ ເອັງ​ເຈີ​ວ່າ “ຂ້ອຍ​ບໍ່​ແມ່ນນາງ​ຟ້າ” ເດີ ຂໍ​ບອກ!

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

ຫມວດຫມູ່

Copy Protected by Chetan's WP-Copyprotect.