ເຂົ້າໃຈເພີ່ມຝຸ່ນລະອອງ PM2,5 ປ້ອງກັນແນວໃດໃຫ້ພໍເໝາະ

ເຂົ້າໃຈເພີ່ມຝຸ່ນລະອອງ PM2,5 ປ້ອງກັນແນວໃດໃຫ້ພໍເໝາະ

ເຂົ້າໃຈເພີ່ມຝຸ່ນລະອອງ PM2,5 ປ້ອງກັນແນວໃດໃຫ້ພໍເໝາະ

ຍັງກາຍປະເດັນຮ້ອນແຮງຢ່າງຕໍ່ເນື່ອງ ສຳລັບບັນຫາມົນລະພິດທາງອາກາດ ຫຼື PM2,5 ສູງເກີນມາດຕະຖານ ເຊິ່ງຕອນນີ້ຢາກຮູ້ຝຸ່ນລະອອງ PM2,5 ເກີດມາຈາກໃສ ແຕກຕ່າງຈາກຝຸ່ນທົ່ວໄປແນວໃດ ແລະ ອັນຕະລາຍຕໍ່ສຸຂະພາບແນວໃດມື້ນີ້ເຮົາມາຮູ້ຂໍ້ມູນເພີ່ມຕື່ມ. ທີມຂ່າວເສດຖະກິດ-ການຄ້າໄດ້ລາຍງານກ່ຽວກັບທີ່ໄປທີ່ມາຂອງ PM 2,5 ມາແລ້ວ ເວົ້າງ່າຍໆກໍ່ຄືອະນຸພາກຂະໜາດນ້ອຍທີ່ມີເສັ້ນຜ່າກາງສະເລ່ຍນ້ອຍກວ່າ 2,5 ໄມຄຣອນແມັດແຂວນລອຍຢູ່ໃນອາກາດລວມກັບໄອນ້ຳ, ຄັວນ ແລະ ແກ໊ສຕ່າງໆ ບໍ່ສາມາດເບິ່ງເຫັນດ້ວຍຕາເປົ່າໄດ້.

ຝຸ່ນລະອອງທີ່ວ່ານີ້ເຖິງຈະມີຂະໜາດນ້ອຍ ແຕ່ເມື່ອມາລວມກັນແລ້ວຈະກວມເອົາພື້ນທີ່ອາກາດມະຫາສານ ລ່ອງລອຍຢູ່ຊັ້ນບັນຍາກາດໃນປະລິມານສູງ ກາຍເປັນໝອກຄວັນກຸ້ມຢູ່ທົ່ວໄປດັ່ງທີ່ເຮົາເຫັນໃນທຸກວັນນີ້. ຝຸ່ນລະອອງ PM2,5 ຖືເປັນມົນລະພິດຕໍ່ສຸຂະພາບຂອງມວນມະນຸດ, ຕາມຂໍ້ມູນຈາກອົງການອະນາໄມໂລກໃຫ້ຮູ້ວ່າ: ເສັ້ນຜົມຫຼາຍຄົນມັກວ່ານ້ອຍຢູ່ແລ້ວ ແຕ່ຝຸ່ນລະອອງເຫຼົ່ານີ້ມີຂະໜາດໜ້ອຍກວ່າເສັ້ນຜົມເຖິງ 20 ເທົ່າ ເຮັດໃຫ້ລອດຜ່ານຂົນໃນຮູດັງເຂົ້າໄປສູ່ປອດ ແລະ ຫຼອດເລືອດໄດ້ງ່າຍ ເຊິ່ງຈະສົ່ງຜົນເສຍຕໍ່ຮ່າງກາຍໃນໄລຍະຍາວ.

ການເກີດຂຶ້ນຂອງມົນລະພິດທາງອາກາດນັ້ນມີຫຼາຍປັດໄຈເຊັ່ນ: ໂຮງຜະລິດໄຟຟ້າ, ຄັວນຈາກທໍ່ອາຍເສຍຂອງລົດຍົນ, ການເຜົາໄໝ້ປ່າ, ຂີ້ເຫຍື້ອລວມເຖິງຄັວນຈາກຢາສູບນຳອີກ. ຄວາມຈິງແລ້ວກິດຈະກຳທີ່ທຸກຄົນເຮັດຢູ່ທຸກວັນແມ່ນມີສ່ວນເຮັດໃຫ້ເກີດຝຸ່ນລະອອງໃໝ່ໆເພີ່ມຂຶ້ນເລື້ອຍ ແຕ່ແຫຼ່ງຕົ້ນຕໍຂອງ PM2,5 ໃນບັນຍາກາດນັ້ນແມ່ນເກີດຈາກການເຜົາໄໝ້ຂອງເຊື້ອໄຟທໍາມະຊາດທີ່ເຜົາໄໝ້ບໍ່ສົມບູນ ແລະ ຝຸ່ນຈາກການກໍ່ສ້າງ.

ຝຸ່ນລະອອງ PM2,5 ເປັນຝຸ່ນລະອອງທີ່ບໍ່ສາມາດເບິ່ງເຫັນດ້ວຍຕາເປົ່າ, ບໍ່ມີກິ່ນ, ມີຂະໜາດນ້ອຍຫຼາຍ ເຊິ່ງສາມາດແຊກຊຶມເຂົ້າໄປໃນຮ່າງກາຍຂອງຄົນເຮົາຈົນໄປເຖິງປອດ ແລະ ບາງສ່ວນສາມາດແຊກຊຶມຜ່ານຖົງລົມເຂົ້າເສັ້ນເລືອດຝອຍລ່ອງລອຍຢູ່ໃນກະແສເລືອດ ແລະ ກະຈາຍຕົວໄປທົ່ວຮ່າງກາຍຂອງເຮົາໄດ້. ຝຸ່ນລະອອງ PM2,5 ສົ່ງຜົນໃຫ້ເກີດສານອະນຸມູນອິດສະຫຼະ, ຫຼຸດລະດັບແອນຕີ້ອອກຊີແດຣນ, ທຳລາຍຄວາມສົມດູນຕ່າງໆຂອງຮ່າງກາຍ ແລະ ກະຕຸ້ນຢີນທີ່ກ່ຽວຂ້ອງກັບການຫຼັ່ງສານອັບເສບ ເຊິ່ງເປັນອັນຕະລາຍຕໍ່ເນື້ອເຫຍື່ອໃນຮ່າງກາຍ ແລະ ສົ່ງຜົນກະທົບຕ່າງໆຕາມມາດັ່ງນີ້:

ກະຕຸ້ນໃຫ້ຜູ້ທີ່ມີໂຣກລະບົບທາງເດີນຫາຍໃຈຊໍ້າເຮື້ອເກີດມີອາການກຳເລີບເຊັ່ນ: ເປັນໂຣກພູມແພ້, ໂຣກຫອບຫືດ ແລະ ໂຣກຖົງລົມໂປ່ງພອງ; ກະຕຸ້ນໃຫ້ຄົນທີ່ມີໂຣກຫົວໃຈ ແລະ ຫຼອດເລືອດຊໍ້າເຮື້ອເກີດມີອາການກຳເລີບ ໂດຍສະເພາະກ້າມເນື້ອຫົວໃຈຂາດເລືອດ. ນອກຈາກນັ້ນ, ຍັງສົ່ງກະທົບໃນໄລຍະຍາວ ຈະເຮັດໃຫ້ການເຮັດວຽກຂອງປອດຊ້າລົງ ແລະ ຍັງເພີ່ມໂອກາດໃຫ້ເກີດເປັນມະເຮັງປອດໄດ້ ເຖິງແມ່ນວ່າຈະບໍ່ໄດ້ສູບຢາກໍ່ຕາມ.

ໃນຂະນະທີ່ ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ໄດ້ອອກແຈ້ງຂ່າວ ສະພາບມົນລະພິດທາງອາກດ ສະບັບເລກທີ 1880/ກຊສ.ຫກ ລົງວັນທີ 15 ມີນາ 2019 ພ້ອມທັງແນະນຳ ແລະ ວິທີປ້ອງກັນໂຕເອງຈາກໝອກຄວັນ ຫຼື ຝຸ່ນລະອອງ PM2,5 ແມ່ນປະຕິບັດດັ່ງນີ້: ຫຼີກລ້ຽງການເຄື່ອນໄຫວກິດຈະກຳກາງແຈ້ງ ຫຼື ນອກອາຄານບ້ານເຮືອນ; ປິດປະຕູ, ປ່ອງຢ້ຽມ ບໍ່ໃຫ້ຂີ້ຝຸ່ນເຂົ້າ; ໃຊ້ຜ້າຈຸ່ມນໍ້າປິດປາກ ແລະ ດັງ ຫຼື ໃຊ້ໜ້າກາກອະນາໄມ N95 (MOUTH MASK) ເມື່ອອອກຈາກນອກເຮືອນ, ຖ້າຫາກບໍ່ສາມາດຊອກຫາຜ້າປິດປາກອະນາໄມໄດ້ N95 (MOUTH MASK) ແມ່ນໃຫ້ໃຊ້ຜ້າປິດປາກທໍາມະດາ ແຕ່ໃຫ້ໃຊ້ສອງຊ້ອນກໍ່ຈະສາມາດຊ່ວຍປ້ອງກັນໄດ້.

ດື່ມນໍ້າໃຫ້ຫຼາຍໆ ແລະ ໃຊ້ນໍ້າເກືອທາຄໍປ້ອງກັນອາການເຈັບຄໍ; ເພີ່ມຄວາມລະມັດລະວັງໃນການຂັບຂີ່ຍານພາຫະນະ. ສຳລັບທ່ານທີ່ມີໂລກປະຈຳຕົວ ຖ້າມີອາການຜິດປົກກະຕິໃຫ້ໄປພົບແພດທັນທີ ແລະ ຫ້າມຈູດຂີ້ເຫຍື່ອຊະຊາຍ ແລະ ຫ້າມຈູດປ່າ ທີ່ຈະເພີ່ມມົນລະພິດຂຶ້ນຕື່ມ.

ຂ່າວ: ນສພ ເສດຖະກິດ-ການຄ້າ

loading...

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

ຫມວດຫມູ່

Copy Protected by Chetan's WP-Copyprotect.