ເອ​ດີ​ບີ​ຊີ້ ເສດ­ຖະ­ກິດ​ລາວ​ຈະ​ຂະ­ຫຍາຍ 6,9% ແລະ 7% ໃນ​ປີ­ໜ້າ

ທະ­ນາ­ຄານ​ພັດ­ທະ­ນາ​ອາ­ຊີ (ເອ​ດີ​ບີ) ໄດ້​ຄາດ​ຄະ­ເນ​ການ​ຂະ­ຫຍາຍ­ຕົວ​ຂອງ​ເສດ­ຖະ­ກິດ​ຂອງ​ລາວ​ແມ່ນ​ຈະ​ຂະ­ຫຍາຍຕົວ­ຢ່າງ​ຕໍ່​ເນື່ອງ ຊຶ່ງ​ໃນ​ປີ 2017 ຈະ​ຢູ່​ທີ່ 6,9% ແລະ 7% ໃນ​ປີ 2018 ໂດຍ​ສະ­ເພາະ​ບັນ­ດາ​ໂຄງ­ການ​ພະ­ລັງ­ງານ​ໄຟ­ຟ້າ ເປັນ​ແຮງ​ກະ​ຕຸ້ນ​ໃຫ້​ເສດ­ຖະ­ກິດ​ຂະ­ຫຍາຍ­ຕົວ ຂະ­ນະ​ທີ່​ຂະ­ແໜງ­ການ​ບໍ­ລິ­ການ​ທີ່ຄາ​ດວ່າ​ຈະ​ກະ​ຕຸ້ນ​ເສດ­ຖະ­ກິດ​ຊ້ຳ­ພັດ​ໄດ້ຫຼຸດ​ລົງ​ເຖິງ 9,8% ຂອງ​ຈຳ­ນວນ​ນັກທ່ອງ​ທ່ຽວ​ທີ່​ເຂົ້າ​ມາ​ລາວ​ໃນ 6 ເດືອນຕົ້ນ​ປີ 2017.

ທ່ານ ຢະ​ຊູ​ຊິ ເນ​ກິ​ຊິ ຜູ້­ຕາງ­ໜ້າ​ທະນາ​ຄານ​ເອ​ດີ​ບີ ປະ­ຈຳ​ລາວ ໄດ້​ກ່າວ​ຕໍ່​ສື່​ມວນ​ຊົນ​ໃນ​ກອງ​ປະ­ຊຸມ​ເຜີຍ­ແຜ່​ບົດ​ລາຍ ງານ​ການ​ພັດ­ທະ­ນາ​ເສດ­ຖະ­ກິດ​ປະ­ຈຳ​ປີ 2017 ສະ­ບັບ​ປັບ­ປຸງ​ທີ່​ຈັດ​ຂຶ້ນ​ວັນ​ທີ 29 ກັນ­ຍາ​ຜ່ານ​ມາ​ວ່າ: ເສດ­ຖະ­ກິດ​ຂອງ​ລາວ​ພວມ​ດຳ­ເນີນ​ໄປ​ດ້ວຍ​ດີ​ໃນ​ຂົງ­ເຂດ​ອາ­ຊີ​ຕາ­ເວັນ​ອອກ­ສຽງ​ໃຕ້, ບັນ­ດາ​ມາດ​ຕະ­ການ​ທີ່​ໄດ້​ມາ​ປະ­ຕິ­ບັດ​ໃນ​ປີ 2016 ແລະ​ຕົ້ນ​ປີ 2017 ລວມ​ທັງ​ມາດ​ຕະ­ການ​ຮັດ­ກຸມ​ດ້ານ​ງົບ­ປະ­ມານ​ລາຍ​ຈ່າຍ ແລະ​ການ​ສົ່ງ­ເສີມ​ການ​ລົງ­ທຶນ​ຂອງ​ພາກ​ເອ­ກະ​ຊົນ​ເຫັນ​ວ່າ​ພວມ​ຜັກ​ດັນ​ເສດ­ຖະ­ກິດໃຫ້​ສືບ­ຕໍ່​ຂະ­ຫຍາຍ­ຕົວ.

ໃນ​ບົດ​ລາຍ​ງານ​ຂອງ​ທະ­ນາ­ຄານເອ​ດີ​ບີ​ລະ­ບຸ​ຕື່ມ​ວ່າ: ການ​ຂະ­ຫຍາຍ­ຕົວເສດ­ຖະ­ກິດ​ຂອງ ສປປ ລາວ ໃນ​ໄລ­ຍະ 6 ເດືອນ​ຕົ້ນ​ປີ 2017 ຢູ່​ທີ່ 6,8%, ໝົດ​ປີ ຈະ​ສືບ­ຕໍ່​ຂະ­ຫຍາຍ­ຕົວ​ຢູ່​ທີ່ 6,9% ແລະ 7% ໃນ​ປີ 2018 ເນື່ອງ​ຈາກ​ໄດ້​ຮັບ ແຮງ​ກະ​ຕຸ້ນ​ຈາກ​ການ​ສົ່ງ​ອອກ​ກະ­ແສ​ໄຟ­ຟ້າ, ບັນ­ດາ​ໂຄງ­ການ​ກໍ່­ສ້າງ​ພະ­ລັງ­ງານ​ໄຟ­ຟ້າ, ໂຄງ­ການ​ກໍ່ສ້າງ​ພື້ນ­ຖານ​ໂຄງ​ລ່າງ​ຂະ­ໜາດ​ໃຫຍ່ ໂດຍ​ສະ­ເພາະ​ໂຄງ­ການ​ທາງ​ລົດ­ໄຟ​ລາວ-ຈີນ, ພ້ອມ​ທັງ​ການ​ເພີ່ມ​ຂຶ້ນ​ການ​ລົງ­ທຶນ ໃນ​ເຂດ​ເສດ­ຖະ­ກິດ​ພິ­ເສດ ແລະ​ເຂດ​ເສດ­ຖະ­ກິດ​ສະ­ເພາະ​ທີ່​ມີ​ລັກ­ສະ­ນະ​ເພີ່ມ​ຂຶ້ນ, ການ​ຜະ­ລິດ​ພືດ​ຜັກ​ທັນ​ຍາ​ຫານ​ເປັນ​ສິນ­ຄ້າ ແລະ​ການ​ສົ່ງ​ອອກ​ສິນ­ຄ້າ​ກະ­ສິ­ກຳ​ສິ່ງ​ດັ່ງກ່າວ​ແມ່ນ​ຈະ​ຊ່ວຍ​ກະ​ຕຸ້ນ​ໃຫ້​ເສດ­ຖະ­ກິດ​ສືບ­ຕໍ່​ຂະ­ຫຍາຍ­ຕົວ.

ແນວ­ໃດ​ກໍ​ດີ ເຖິງ​ວ່າ​ຂະ­ແໜງ​ກະ­ສິ­ກຳ​ຈະ​ຂະ­ຫຍາຍ­ຕົວ​ຢ່າງ​ຕໍ່​ເນື່ອງ​ກໍ​ຕາມ​ແຕ່​ວ່າ​ອັດ­ຕາ​ການ​ຂະ­ຫຍາຍ­ຕົວ​ຂອງ​ຂະ­ແໜງ­ການ​ບໍ­ລິ­ການ​ທີ່​ທາງ​ທະ­ນາ­ຄານ​ເອ​ດີ​ບີ​ໄດ້​ຄາດ​ຄະ­ເນ​ໄວ້​ກ່ອນ​ໜ້າ​ນີ້​ວ່າ ຈະ​ເປັນ​ຕົວ​ຂັບ​ເຄື່ອນ​ເຮັດ​ໃຫ້​ເສດ­ຖະ­ກິດຂອງ​ລາວ​ຂະ­ຫຍາຍ​ແມ່ນ​ໄດ້​ຫຼຸດ​ລົງ​ໂດຍ ໃນ​ເຄີ່ງ​ປີ 2017 ຈຳ­ນວນ​ນັກ​ທ່ອງ​ທ່ຽວ ໄດ້​ຫຼຸດ​ລົງ​ເຖິງ 9,8% ຂອງ​ຈຳ­ນວນນັກ​ທ່ອງ​ທ່ຽວ​ທີ່​ເຂົ້າ​ມາ​ລາວ, ອຸດ­ສາ­ຫະ­ກຳ​ຂະ­ຫຍາຍ­ຕົວ​ຄົງ​ຕົວ​ຢູ່​ທີ່ 14,5%, ເງິນ​ທຶນ​ສຳ­ຮອງ​ເປັນ​ສະ­ກຸນ​ເງິນ​ຕ່າງ­ປະ­ເທດ​ໄດ້​ເພີ່ມ​ຂຶ້ນ​ຈາກ 767 ລ້ານ​ໂດ​ລາ ໃນ​ທ້າຍ​ປີ 2016 ມາ​ຢູ່​ທີ່ 887 ລ້ານ​ໂດ​ລາ, ອັດ­ຕາ​ເງິນ​ເຟີ້​ສຳ­ລັບ​ປີ 2017 ແລະ 2018 ຈະ​ຫຼຸດ​ລົງ​ຢູ່​ທີ່ 1% ແລະ 1,5% ຕາມ​ລຳ­ດັບ​ອັນ​ເນື່ອງ​ຈາກ​ລາ­ຄາ​ນ້ຳ­ມັນ ແລະ​ອາ­ຫານ​ໃນ​ປະ­ຈຸ​ບັນ​ຍັງ​ຄົງ​ທີ່.

ຂ່າວ: ເສດຖະກິດ-ສັງຄົມ

loading...

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.