ແຮງງານລາວຢູ່ໄທຂຶ້ນທະບຽນແລ້ວ 10 ພັນກວ່າຄົນ

ແຮງງານລາວຢູ່ໄທຂຶ້ນທະບຽນແລ້ວ 10 ພັນກວ່າຄົນ

ແຮງງານລາວຢູ່ໄທຂຶ້ນທະບຽນແລ້ວ 10 ພັນກວ່າຄົນ

ປະຈຸບັນການຂຶ້ນທະບຽນແຮງງານລາວທີ່ໄປເຄື່ອນໄຫວອອກແຮງງານຢູ່ປະເທດໄທຮອດດຽວນີ້ມີແລ້ວ 10 ພັນກວ່າຄົນ, ໂດຍລາຍງານດັ່ງ ກ່າວໃຫ້ຮູ້ໃນໂອກາດທີ່ທ່ານ ບຸນຄົງ ຫຼ້າສຸກັນ ຮອງລັດຖະມົນຕີກະຊວງແຮງງານ ແລະສະຫວັດດີການສັງຄົມພ້ອມ ດ້ວຍຄະນະໄດ້ເດີນທາງຢ້ຽມຢາມຊຸກຍູ້ໜ່ວຍງານສະຖານະພາບແຮງງານລາວທີ່ເຮັດວຽກຢູ່ປະເທດໄທແບບບໍ່ຖືກຕ້ອງຕາມກົດໝາຍ, ທີ່ປະຈຳຢູ່ບາງກອກປະເທດໄທໃນລະຫວ່າງວັນທີ 10-14 ພະຈິກ 2017 ນີ້.

ຫົວໜ້າໜ່ວຍງານປັບສະຖານະພາບ ແຮງງານລາວທີ່ເຮັດວຽກຢູ່ປະເທດໄທ ແບບບໍ່ຖືກຕ້ອງຕາມກົດໝາຍໃຫ້ຮູ້ວ່າ: ຜ່ານການຈັດຕັ້ງປະຕິບັດວຽກງານປັບ ສະຖານະພາບແຮງງານລາວນັບແຕ່ ວັນທີ 28 ສິງຫາ-8 ພະຈິກ 2017 ນີ້, ສາມາດອອກໜັງສືຢັ້ງຢືນສະຖານະພາບບຸກຄົນ (CI) ແລະບັດອະນຸຍາດ ເຮັດວຽກໃຫ້ແຮງງານຜູ້ທີ່ມີບັດສີບົວໄດ້ທັງໝົດ 10.511 ຄົນ, ໃນນີ້ເປັນ ແຮງງານ 9.786 ຄົນ, ຍິງ 4.480 ຄົນ, ຜູ້ຕິດຕາມ 725 ຄົນ, ໂດຍກວມ ເອົາຂະແໜງອຸດສາຫະກຳ-ການຜະລິດ 1.389 ຄົນ, ຂະແໜງການກໍ່ສ້າງ 955 ຄົນ, ຂະແໜງກະສິກຳ 1.862 ຄົນ, ຂະແໜງປະມົງ 589 ຄົນ ແລະຂະແໜງການບໍລິການ 4.991 ຄົນ, ໃນການປັບສະຖານະພາບແຮງງານໃຫ້ກັບກຸ່ມຜູ້ອອກແຮງງານລາວທີ່ມີບັດສີບົວໃນໄລ ຍະຜ່ານມາເຫັນໄດ້ວ່າຈຳນວນແຮງງານເຂົ້າມາປັບສະຖານະພາບນັ້ນມີຈຳ ນວນໜ້ອຍເມື່ອທຽບໃສ່ຄັ້ງກ່ອນທີ່ຜ່ານມາ, ເນື່ອງຈາກມີຫຼາຍປັດໄຈ, ເງື່ອນໄຂ ແລະສາເຫດທີ່ພາໃຫ້ແຮງງານເຂົ້າມາ ປັບສະຖານະພາບບໍ່ໄດ້ຕາມແຜນການ ທີ່ໄດ້ຕົກລົງກັນກັບຝ່າຍໄທໃນຈຳນວນ 300 ຄົນຕໍ່ວັນ ແລະຄາດວ່າໃນເດືອນ ທັນວາ 2017 ຈຳນວນແຮງງານທີ່ຈະອອກມາປັບສະຖານະພາບກໍຈະມີຈຳ ນວນໜ້ອຍ ແລະກໍຈະບໍ່ໄດ້ຕາມເປົ້າໝາຍເຊັ່ນດຽວກັນ, ເນື່ອງຈາກຈຳນວນ ຕົວ ເລກແຮງງານ ທີ່ໄດ້ຂຶ້ນທະບຽນໄວ້ນີ້ ເປັນຕົວເລກເກົ່າຂອງປີຜ່ານມາ ແລະອີກສ່ວນໜຶ່ງກໍອາດຈະກັບຄືນເມືອບ້ານ ຫຼື ໄປເຮັດເອກະສານຂຶ້ນທະບຽນໃບຈັບ ຄູ່ລະຫວ່າງນາຍຈ້າງ-ລູກຈ້າງ ຫຼື ຈະໄປເຮັດເອກະສານເຂົ້າມາໃນລະບົບ MOU ຫຼື ເຮັດໃນຮູບແບບການອື່ນໆອີກ ແລະອີກດ້ານໜຶ່ງກໍແມ່ນສະພາບໄພນ້ຳ ຖ້ວມໃນບາງເຂດ, ໃນບາງແຂວງຂອງປະເທດໄທທີ່ປະສົບໄພຍັງສືບຕໍ່ ຊຶ່ງຈະເປັນຜົນກະທົບຕໍ່ການຈັດຕັ້ງປະຕິບັດໜ້າວຽກຂອງໜ່ວຍງານປັບສະຖານະ ພາບບໍ່ໄດ້ຕາມແຜນການທີ່ວາງໄວ້.

ໂອກາດດັ່ງກ່າວ, ທ່ານ ບຸນຄົງ ຫຼ້າ ສຸກັນ ຍັງໄດ້ເນັ້ນໜັກໃຫ້ໜ່ວຍງານປັບສະຖານະພາບແຮງງານລາວທີ່ເຮັດວຽກຢູ່ປະເທດໄທຈົ່ງພ້ອມກັນເອົາໃຈໃສ່ປະຕິບັດໜ້າທີ່ຕາມຄວາມຮັບຜິດຊອບຕາມການແບ່ງງານດ້ວຍຄວາມເອົາໃຈໃສ່, ທັງປືກສາຫາລື ແລະລາຍງານ ກວດກາຢ່າງເປັນປົກກະຕິ, ພ້ອມທັງປະ ສານສົມທົບໂດຍຜ່ານທາງການທູດກັບກົມການຈັດຫາງານໄທເພື່ອໃຫ້ການ ຮ່ວມມືຢ່າງເຕັມສ່ວນໃນການຂົນຂວາຍປະຊາສຳພັນ, ຜັກດັນ ຫຼື ນຳເອົາຜູ້ອອກແຮງງານກຸ່ມບັດສີບົວທີ່ໄດ້ຂຶ້ນທະບຽນ ຈຳນວນທີ່ຍັງເຫຼືອອອກມາປັບສະຖານະພາບຕາມກຳນົດເວລາທີ່ໄດ້ກຳນົດໄວ້ຮ່ວມກັນໃຫ້ທັນເວລາ.

ຂ່າວ: ເສດຖະກິດ-ສັງຄົມ

loading...

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

ຫມວດຫມູ່

Copy Protected by Chetan's WP-Copyprotect.