ອາ​ເມ​ລິ​ກາ​ເກັບ​ພາສີ​ເຮືອບິນ​ບອມບາ​ເດຍ​ເກືອບ 300%

ລັດຖະບານ​ອາ​ເມ​ລິ​ກາລະ​ບຸ​ວ່າ ບໍລິສັດ​ຜະລິດ​ເຮືອບິນບອມບາ​ເດຍ ​ໄດ້​ຮັບ​ການ​ອູດ​ໜູນ​ຈາກ​ລັດຖະບານ​ກາ​ນາ​ດາ​ຫຼາຍ​ເກີນ​ໄປ ສົ່ງ​ຜົນ​ເຮັ​ດ​ໃຫ້​ຂາຍ​ສິນຄ້າ​ໃນ​ອາ​ເມ​ລິ​ກາ​ລາຄາ​ຕໍ່າ​ກວ່າ​ປົກ​ກະຕິ ຈິ່ງ​ຄວນ​ຕ້ອງ​ມີ​ການ​ຂຶ້ນ​ພາສີ​ອີກ​ເກືອບ 300%.

ສຳນັກ​ຂ່າວ​ຕ່າງປະ​ເທດ​ລາຍ​ງານ​ວ່າ: ກະຊວງ​ການ​ຄ້າ​ຂອງ​ອາ​ເມ​ລິກາ​ອອກ​ຖະ​ແຫຼ​ງການ​ໃນ​ທ້າຍ​ອາທິດ​ທີ່​ຜ່ານ​ມາ ຢືນຢັນ​ການ​ກຳນົດ​ພາສີ​ນຳ​ເຂົ້າ​​ເຮືອບິນ​ທີ່​ຜະລິດ​ໂດ​ບບໍລິສັດ​ບອມບາ​ເດຍຂອງ​ກາ​ນາ​ດາ​ໃນ​ອັດຕາ 292,21% ຕໍ່າ​ກວ່າ​ທີ່​ເຄີຍ​ມີ​ການ​ຄາດ​ຄະ​ເນ​ກ່ອນ​ໜ້າ​ນີ້​ເລັກ​ນ້ອຍ ​ໂດຍ​ຈະ​ມີ​ຜົນ​ຢ່າງ​ເປັນ​ທາງ​ການ​ຕັ້ງ​ແຕ່​ວັນ​ທີ 1 ກຸມພາ​ປີ 2018 ​ເປັນຕົ້ນ​ໄປ ຫຼັງ​ຈາກ​ໄດ້​ຮັບ​ການ​ພິຈາລະນາ ​ແລະ ອະນຸຍາດ​ຈາກ​ຄະນະ​ກຳ​ມະ​ທິການ​ການ​ຄ້າ​ສາກົນ​ຂອງ​ລັດຖະບານ​ອາ​ເມ​ລິ​ກາ ທີ່​ສ່ວນ​ໃຫຍ່​ຈະ​ມີ​ມະຕິ​ຕາມ​ການສະ​ເໜີ​ຂອງ​ກະຊວງ​ການ​ຄ້າ. ດ້ານ​ທ່ານ ອິລ​ເບີ ຮອສ ລັດຖະມົນຕີ​ກະຊວງ​ການ​ຄ້າ​ຂອງ​ອາ​ເມ​ລິ​ກາ​ກ່າວ​ວ່າ ລັດຖະບານ​ກາ​ນາດ​າ​ໃຊ້​ມາດ​ຕະການ​ອູດ​ໜູນ​ລາຄາ​ສິນຄ້າ​ຂອງ​ບອມບາ​ເດ​ຍຢ່າງ​ບໍ່​ເປັນ​ທຳ ສົ່ງ​ຜົນ​ໃຫ້​ບໍລິສັດ​ສາມາດ​ຂາຍ​ເຮືອບິນ​ໄດ້​ໃນ​ລາຄາ​ຕົນ​ທຶນ ​ແລະ ລາຄາ​ຈຳໜ່າຍ​ສະ​ເລ່ຍຂອງສິນຄ້າ​ປະ​ເພດ​ດຽວ​ກັນ​ໃນ​ຕະຫຼາດ​ໂລກ.

ໂດຍ​ລາຍ​ງານ​ຂອງ​ບໍລິສັດ ​ໂບອິ້ງ ຜູ້ຜະລິດ​ເຮືອບິ​ນລາຍ​ໃຫຍ່​ຂອງ​ໂລກ​ຈາກ​ອາ​ເມ​ລິ​ກາ ​ແຈ້ງຂໍ້​ມູນ​ການ​ຊື້​ຂາຍ​ລະຫວ່າງ​ເດລຕ້າ ​ແອ​ລາຍ ກັບ​ບອມບາ​ເດຍ​ໃນ​ປີ 2016 ວ່າ ​ເດລຕ້າ ​ແອ​ລາຍ​ຊື້​ເຮືອບິນ​ລຸ້ນ ຊີ​ເອສ-100 ​ໃນ​ລາຄາ ລຳ​ລະ 19,6 ລ້ານ​ໂດ​ລາ​ສະຫະລັດ ຕໍ່າ​ກວ່າ​ລາຄາ​ຂາຍ​ໃນ​ກາ​ນາ​ດາ​ຢູ່​ທີ່​ລຳ​ລະ 33,2 ລ້ານ​ໂດ​ລາ.

loading...

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.