ຣິ​ຄຣາ​ໂດ ກາ​ກ້າ ປະ­ກາດ​ອຳ​ລາ​ວົງ​ການ​ບານ­ເຕະ​ຮຽບ​ຮ້ອຍ​ແລ້ວ

ຣິ​ຄຣາ​ໂດ ກາ​ກ້າ ອະ­ດີດ​ດາວ​ຍິງ​ທີມ​ຊາດ​ບຣາ​ຊິນ ຕັດ­ສິນ​ໃຈ​ແຂວນ​ເກີບ​ສະ​ຕັດ​ຮຽບ​ຮ້ອຍ​ແລ້ວ ໃນ​ໄວ 35 ປີ ໂດຍ ກາ​ກ້າ ເປີດ​ໃຈ​ວ່າ “ອາ­ຊີບ​ນັກ​ເຕະ​ກ້າວ​ມາ​ໄກ​ກວ່າ​ທີ່​ຕົນ​ຄິດ​ເອົາ​ໄວ້ ແລະ​ຕອນ​ນີ້​ພ້ອມ​ທີ່​ຈະ​ອອກ​ເດີນ­ທາງ​ຄັ້ງ​ໃໝ່​ແລ້ວ”.

ສຳ­ນັກ​ຂ່າວ​ກີ­ລາ​ຕ່າງ­ປະ­ເທດ​ໄດ້​ລາຍ​ງານ​ເມື່ອ​ອາ­ທິດ​ທີ່​ຜ່ານ​ມາ​ວ່າ ຣິ​ຄຣາ​ໂດ ກາ​ກ້າ ອະ­ດີດ​ນັກ­ກີ­ລາ​ເຕະ­ບານ​ຊື່​ດັງ​ຂອງ​ທີມ ເຣ​ອັລ ມາດ​ຣິດ ແລະ​ເອ​ຊີ ມິ​ລານ ປະ­ກາດ​ອຳ​ລາ​ວົງ​ການ​ບານ­ເຕະ​ຮຽບ​ຮ້ອຍ​ແລ້ວ ໂດຍ​ດາວ​ເຕະ​ແດນ​ແຊມ​ບ້າ ຊຶ່ງ​ເຄີຍ​ຄວ້າ​ລາງ​ວັນ​ບັລ​ລົງ​ດໍ​ຣ ປີ 2007 ໃຊ້​ເວ­ລາ​ຫຼິ້ນ ລະ­ດູ​ການ​ສຸດ​ທ້າຍ​ໃນ​ອາ­ຊີບ​ນັກ​ເຕະ​ກັບ ອໍ​ຣ​ແລນ​ໂດ ຊິ​ຕີ ທີມ​ໃນ​ເສິກ​ເມ​ເຈີ ລີກ ຊອກ​ເກີ​ຣ (ເອັມ​ແອ​ລ​ເອ​ສ) ສະ­ຫະ­ລັດ​ອາ​ເມ​ຣິ​ກາ ແຕ່ ກາ​ກ້າ ກໍ​ປະ­ກາດ​ຕົວ­ຢ່າງ​ຊັດ​ເຈນ​ຕັ້ງ­ແຕ່​ເດືອນ​ຕຸ­ລາ 2017 ຜ່ານ​ມາ ວ່າ​ຈະ​ບໍ່​ຕໍ່​ສັນ­ຍາ​ກັບ​ຕົ້ນ​ສັງ­ກັດ.

ຣິ​ຄຣາ​ໂດ ກາ​ກ້າ ຢືນ­ຢັນ​ເລື່ອງ​ການ​ອຳ​ລາ​ວົງ​ການ​ບານ­ເຕະ​ຜ່ານ​ສື່​ອອນ​ລາຍ​ສ່ວນ​ຕົວ ໂດຍ​ເປີດ­ເຜີຍ​ວ່າ “ທັງ​ໝົດ​ນີ້​ມັນ​ຍິ່ງ​ໃຫຍ່​ຫຼາຍ​ກວ່າ​ທີ່​ຕົນ​ຄິດ​ເອົາ​ໄວ້ ຕົນ​ຂອບ­ໃຈ​ຫຼາຍໆ! ແລະ​ຕອນ​ນີ້​ຕົນ​ພ້ອມ​ແລ້ວ​ສຳ­ລັບ​ການ​ເດີນ­ທາງ​ຄັ້ງ​ຕໍ່​ໄປ” ສຳ­ລັບ ກາ​ກ້າ ເລີ່ມ​ຕົ້ນ​ອາ­ຊີບ​ນັກ​ເຕະ​ກັບ​ທີມ ເຊົາ ເປົາ​ໂລ ຍັກ​ໃຫຍ່​ໃນ​ລີກ​ບຣາ​ຊິນ ໂດຍ​ໄດ້​ເປີດ​ຕົວ​ກັບ​ທີມ​ໃນ​ປີ 2001 ແລະ​ຕິດ​ທີມ​ຊາດ​ບີ​ຣາ​ຊິນ ຮ່ວມ​ລຸຍ​ເສິກ​ບານ­ເຕະ​ໂລກ 2002 ຊຶ່ງ​ທີມ​ບ້ານ​ເກີດ​ກໍ​ສາ­ມາດ​ຄວ້າ​ແຊ໋ມ​ມາ​ຄອງ​ໄດ້​ຢ່າງ​ຍິ່ງ​ໃຫຍ່ ຈາກ​ນັ້ນ ກາ​ກ້າ ກໍ​ຍ້າຍ​ມາ​ຫຼິ້ນ​ໃຫ້​ກັບ ເອ​ຊີ ມິ​ລານ ໃນ​ປີ 2003 ຊຶ່ງ​ເຂົາ​ກໍ​ປະ­ສົບ​ຄວາມ​ສຳ­ເລັດ​ຢ່າງ​ຫຼວງ­ຫຼາຍ ທັງ​ການ​ຄວ້າ​ແຊ໋ມ​ກັລ​ໂຊ້ ເຊ​ເຣຍ ອາ ແລະ​ຢູ​ຟາ ແຊ໋ມ​ປຽນ ລີກ ປີ 2007 ຫຼັງ​ຈາກ​ນັ້ນ ກາ​ກ້າ ກໍ​ຍ້າຍ​ຮ່ວມ​ທີມ ເຣ​ອັລ ມາດ​ຣິດ ດ້ວຍ​ຄ່າ​ຕົວ​ສະ­ຖິ­ຕິ​ໂລກ 56 ລ້ານ​ປອນ ໃນ​ປີ 2009 ຊຶ່ງ​ເຂົາ​ກໍ​ປະ­ສົບ​ຄວາມ​ສຳ­ເລັດ​ຢ່າງ​ລົ້ນ​ຫຼາມ​ໃນ​ຖິ່ນ​ເບຣ​ນາ​ເບວ ກ່ອນ​ທີ່​ຈະ​ຍ້າຍ​ກັບ​ມາ​ຫຼິ້ນ​ກັບ ເອ​ຊີ ທິ​ລານ ໃນ​ປີ 2013.

ລວມ​ທັງ​ຍັງ​ເປັນ​ນັກ​ເຕະ​ຄົນ​ສຸດ​ທ້າຍ​ທີ່​ສາ­ມາດ​ຄວ້າ​ລາງ​ວັນ​ບັລ​ລົງ​ດໍ​ຣ​ມາ​ຄອງ ກ່ອນ​ທີ່ ຄຣິດ​ເຕຍ​ໂນ ໂຣ​ນັບ​ໂດ ຫົວ­ໜ້າ​ທີມ​ຊາດ​ປອກ​ຕຸຍ​ການ ສັງ­ກັດ​ທີມ​ເຣ​ອັລ ມາດ​ຣິດ ແລະ​ລິ​ໂອ​ເນ​ລ ເມ​ສ​ຊີ ດາວ​ຍິງ​ທີມ​ຊາດ​ອາກ​ຊັງ​ຕິນ​ກອງ​ໜ້າ​ຕົວ​ເກ່ງ​ຂອງ​ທີມ​ບາ​ເຊ​ໂລ​ນາ ຈະ​ຜັດ­ປ່ຽນ​ກັນ​ຄອງ​ລາງ​ວັນ​ບັລ​ລົງ​ດໍ​ຣ​ມາ​ຈົນ​ເຖິງ​ປັດ­ຈຸ­ບັນ.

loading...

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.