ຕິດ­ຕາມ​ໂຄງ­ການກໍ່­ສ້າງ ເຂດ​ພັດ­ທະ­ນາ​ກວມ​ລວມ​ໄຊ​ເຊດ​ຖາ

ທ່ານ ສຸ­ພັນ ແກ້ວ​ມີ​ໄຊ ລັດ­ຖະ­ມົນ­ຕີກະ­ຊວງ​ແຜນ­ການ ແລະ ການ​ລົງ­ທຶນ ພ້ອມ​ດ້ວຍ​ຄະ­ນະ ໄດ້​ເຄື່ອນ​ໄຫວ​ຢ້ຽມ­ຢາມ ເພື່ອ​ຊຸກ­ຍູ້​ໂຄງ­ການ​ກໍ່­ສ້າງ ເຂດ​ພັດ­ທະ­ນາ​ກວມ​ລວມ​ໄຊ​ເຊດ​ຖາ​ນະ­ຄອນ­ຫຼວງ​ວຽງ​ຈັນຂອງ​ບໍ­ລິ­ສັດ​ຮ່ວມ​ທຶນ​ລາວ-ຈີນ ຈຳ­ກັດ ຊຶ່ງ​ໄດ້​ຮັບ​ການ​ຕ້ອນ­ຮັບ​ຈາກ ທ່ານ ກຽງ­ຄຳ ພຸດ​ທະ​ວົງ­ສາ ຮອງ​ອຳ­ນວຍ​ການ​ບໍ­ລິ­ສັດຮ່ວມ​ທຶນ​ລາວ-ຈີນ ຈຳ­ກັດ ພ້ອມ​ຄະ­ນະ​ບໍ­ລິ­ຫານ ແລະ​ພະ­ນັກ­ງານ​ທີ່​ກ່ຽວ­ຂ້ອງ.

ການ​ຕິດ­ຕາມ​ໂຄງ­ການ ກໍ່­ສ້າງ​ເຂດ​ພັດ­ທະ­ນາ​ກວມ​ລວມ​ໄຊ​ເຊດ​ຖາໃນ​ຄັ້ງ​ນີ້ ແນ­ໃສ່​ຊຸກ­ຍູ້​ການ­ຈັດ­ຕັ້ງ​ປະ­ຕິ­ບັດ​ໂຄງ­ການ ໃຫ້​ສຳ­ເລັດ​ຕາມ​ແຜນ­ການ​ທີ່​ວາງ​ໄວ້ ໃນ​ວາ­ລະ​ດັ່ງ­ກ່າວ​ທາງ​ຄະ­ນະ​ໄດ້​ຮັບ​ຟັງ​ລາຍ​ງານ​ດຳ­ເນີນ​ໂຄງ­ການ​ໂດຍ ທ່ານ ຫຼີວ ຫູ້ ປະ­ທານ​ບໍ­ລິ­ສັດຮ່ວມ​ທຶນລາວ-ຈີນ ຈຳກັດ ຊຶ່ງ​ໄດ້​ໃຫ້​ຮູ້​ສະ­ພາບ​ການ​ພັດ­ທະ­ນາ ເຂດ​ກວມ​ລວມໄຊ​ເຊດ​ຖາ ເປັນ​ການ​ຮ່ວມ​ທຶນ​ລະ­ຫວ່າງອົງ­ການ​ປົກ­ຄອງ​ນະ­ຄອນ­ຫລວງ​ວຽງ​ຈັນ ຕາງ­ໜ້າ​ລັດ­ຖະ­ບານ​ລາວ ແລະ ບໍ­ລິ­ສັດ​ລົງ­ທຶນ​ຕ່າງ­ປະ­ເທດ ແຂວງ​ຢູນ​ນານ ທີ່​ຂຶ້ນ​ກັບ​ກຸ່ມ​ບໍ­ລິ­ສັດ​ກໍ່­ສ້າງ ແລະ ລົງ­ທຶນ​ແຂວງ​ຢູນ​ນານ​ຫຸ້ນ​ສ່ວນ ຈຳ­ກັດ ຕາງ­ໜ້າ​ລັດ­ຖະ­ບານ​ຈີນ ເຊິ່ງ​ທັງ​ສອງ​ຝ່າຍ​ໄດ້​ສ້າງ­ຕັ້ງ​ບໍ­ລິ­ສັດ ຮ່ວມ​ທຶນ​ລາວ-ຈີນ ຈຳ­ກັດ ຂຶ້ນ ເພື່ອ​ເປັນ​ຜູ້​ພັດ­ທະ­ນາ​ເຂດ​ດັ່ງ­ກ່າວ ໂດຍ​ມີ​ທຶນ​ທັງ​ໝົດ 128 ລ້ານ​ໂດ​ລາ​ສະ­ຫະ­ລັດ ໃນ​ນັ້ນ ອົງ­ການ​ປົກ­ຄອງ​ນະ­ຄອນ­ຫຼວງ​ວຽງ​ຈັນ ອອກ­ທຶນ 30 ລ້ານ​ໂດ​ລາ​ສະ­ຫະ­ລັດ ໂດຍ​ຖື​ເອົາ​ການ​ຊົດ​ເຊີຍ​ຄືນ​ທີ່​ດິນ​ເປັນ​ທຶນ​ກວມ​ເອົາ 25% ແລະ ບໍ­ລິ­ສັດລົງ­ທຶນ​ຕ່າງ­ປະ­ເທດ​ແຂວງ​ຢູນ​ນານ​ອອກ­ທຶນ 98 ລ້ານ​ໂດ​ລາ​ສະ­ຫະ­ລັດ ໂດຍ​ຖື​ເອົາ​ມູນ​ຄ່າ​ການ​ກໍ່­ສ້າງ​ສະ­ໜາມ­ກິ­ລາ​ຊີ­ເກມ ປີ 2009 ເປັນ​ທຶນ​ກວມ 75% ຊຶ່ງ​ໃນ​ໄລ­ຍະ​ຜ່ານ​ມາ​ແມ່ນ​ໄດ້​ມີ​ການ​ກໍ່­ສ້າງ​ພື້ນ­ຖານ​ໂຄງ​ລ່າງ​ຢ່າງ​ບໍ່​ຢຸດ​ຢັ້ງ ເພື່ອ​ໃຫ້​ກາຍ­ເປັນ​ກຳ­ລັງ​ຄ້ຳ​ດັນ ຊຶ່ງ​ປັດ­ຈຸ­ບັນ​ໄດ້​ລົງ­ທຶນ​ທັງ​ໝົດ ປະ­ມານ 400 ລ້ານ​ໂດ​ລາ​ສະ­ຫະ­ລັດ ໂດຍ​ໜ້າ​ວຽກ​ທີ່​ສຳ­ເລັດ​ປະ­ກອບ​ມີ​ການ​ກໍ່­ສ້າງ​ພື້ນ­ຖານ​ໂຄງ​ລ່າງ​ໄລ­ຍະ​ທີ 1 ແລະ ປັບ​ໜ້າ­ດິນ ເນື້ອ­ທີ່ 400 ເຮັກ­ຕາ ກໍ່­ສ້າງ​ເສັ້ນ­ທາງ​ຍາວ 18 ກິ­ໂລ­ແມັດ ປູກ​ຕົ້ນ­ໄມ້​ລຽບ​ຕາມ​ເສັ້ນ­ທາງ​ກໍ່­ສ້າງ ວາງ​ຕາ​ຂ່າຍ​ທໍ່​ສະ­ໜອງ​ນ້ຳ​ປະ­ປາ ທໍ່​ລະ­ບາຍ​ນ້ຳ​ເປື້ອນ​ໄລ­ຍະ​ທີ 1 ກໍ່­ສ້າງ​ໂຮງ­ງານ​ມາດ­ຕະ­ຖານ​ຫລາຍ​ກວ່າ 50.000 ຕາ​ແມັດ ກໍ່­ສ້າງ​ອາ­ຄານ​ບໍ­ລິ­ຫານ​ຫໍ​ພັກ​ພະ­ນັກ­ງານ ສູນ​ບໍ­ລິ­ການ​ລູກ​ຄ້າ ຕຶກ​ອາ­ຄານ​ຫໍ​ພັກ​ເຂດ​ໂຮງ­ງານ ແລະ​ອື່ນໆ ລວມ​ເນື້ອ ທີ່​ກໍ່­ສ້າງ​ທັງ​ໝົດ​ຫລາຍ​ກວ່າ 20.000 ຕາ​ແມັດ ແລະ​ກຳ­ລັງ​ເລີ່ມ​ກໍ່­ສ້າງ​ສະ­ຖາ­ນີ​ໄຟ­ຟ້າ 115 ກິ​ໂລ​ວັດ (KV) ພ້ອມ​ນັ້ນ ຍັງ​ໄດ້​ເຊີນ​ນັກ​ອອກ​ແບບ​ທີ່​ມີ​ຊື່​ສຽງ​ຂອງ​ປະ­ເທດ​ສິງ​ກะ​ໂປ ອອກ​ແບບ​ວາງ​ແຜນ​ໄລ­ຍະ 2 ແລະ​ໄລ­ຍະ 3 ຂອງ​ເຂດ​ພັດ­ທະ­ນາ ຊຶ່ງ​ພາຍ­ຫລັງ​ສຳ­ເລັດ​ການ​ອອກ​ແບບ​ແລ້ວ ກໍ​ຈະ​ຈັດ​ຕັ້ງ​ປະ­ຕິ­ບັດ​ວຽກງານ​ກໍ່­ສ້າງ​ຢ່າງ­ຮອບ­ດ້ານ​ເພື່ອ​ສ້າງ​ເປັນ​ເຂດ​ເສດ­ຖະ­ກິດ​ແບບ​ກວມ​ລວມ​ທີ່​ມີ​ຊື່​ສຽງ​ຂອງ ສປປ ລາວ.

ໃນ​ໂອ­ກາດ​ດັ່ງ­ກ່າວ ທ່ານ​ລັດ­ຖະ­ມົນ­ຕີ​ກະ­ຊວງ​ແຜນ­ການ ແລະ ການ​ລົງ­ທຶນ ພ້ອມ​ຄະ­ນະ​ໄດ້​ເຄື່ອນ​ໄຫວ​ຢ້ຽມ­ຢາມ​ເຂດ​ນິ­ຄົມ​ອຸດ​ສະ­ຫະ​ກຳ ແລະ​ການ​ຄ້າ ວຽງ​ຈັນ-ໂນນ​ທອງ ເຊິ່ງ​ໄດ້​ສ້າງ­ຕັ້ງ​ຂຶ້ນ​ເມື່ອ​ປີ 2009 ພາຍ​ໃຕ້​ສັນ­ຍາ​ການ​ຮ່ວມ​ມື​ລະ­ຫວ່າງ​ລັດ­ຖະ­ບານ​ລາວ ຕາງ­ໜ້າ​ໂດຍ​ກະ­ຊວງ​ອຸດ­ສາ­ຫະ­ກຳ ແລະ ການ​ຄ້າ ເອົາ​ສິດ​ນຳ​ໃຊ້​ທີ່​ດິນ 110 ເຮັກ­ຕາ ປະ­ກອບ​ຮຸ້ນ 30% ແລະ ບໍ­ລິ­ສັດ ໜຳ​ເວ​ພັດ­ທະ­ນາ ຈຳ­ກັດ (ຈີນ​ໄຕ້​ຫວັນ) ຖື​ຮຸ້ນ 70% ໄດ້​ສ້າງ­ຕັ້ງ​ເປັນ​ບໍ­ລິ­ສັດ ຮ່ວມ​ທຶນ ລາວ-ວີ​ຕາ ພັດ­ທະ­ນາ ຈຳ­ກັດ ມີ​ມູນ​ຄ່າ​ການ​ລົງ­ທຶນ​ທັງ​ໝົດ 43 ລ້ານ​ໂດ​ລາ​ສະ­ຫະ­ລັດ ແລະ ມີ​ອາ­ຍຸ​ການ​ສຳ​ປະ­ທານ 75 ປີ.

ຂ່າວ: ນສພ ວັນອາທິດ

loading...

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.