ໜຶ່ງ​ວັນ​ຄວນ​ຖ່າຍ­ໜັກ​ຈັກ​ເທື່ອ​ຈິ່ງ​ຖື​ວ່າ ສຸ­ຂະ­ພາບ​ດີ?

ການ​ຖ່າຍ­ໜັກ​ຈັດ​ເປັນ​ໜຶ່ງ​ໃນ​ກົນ​ໄກ ຫຼື ຂະ​ບວນ​ການ​ເຮັດ​ວຽກ​ຢ່າງ​ເປັນ​ລະ­ບົບ​ຂອງ​ຮ່າງ ກາຍ ຖ້າ​ຫາ​ກວ່າ​ໃນ​ວັນ​ໜຶ່ງໆ​ບໍ່​ມີ​ການ​ຖ່າຍ­ໜັກ​ກໍ​ຈະ​ກາຍ­ເປັນ​ບັນ­ຫາ​ສຸ­ຂະ­ພາບ​ສະ​ສົມ (ຂີ້​ແກ່ນ) ຮູທະ­ວານ​ຈີກ​ຂາດ ເປັນ​ບາດ​ຊຳ​ເຮື້ອ ແລະ​ເຈັບ​ແສບ​ທໍ­ລະ­ມານ​ເວ­ລາ​ຖ່າຍ ຊຶ່ງ​ເປັນ​ປັດ​ໄຈ​ທີ່​ນຳ­ໄປ​ສູ່​ການ​ກິນ​ຢາ​ຂັບ​ຖ່າຍ ແຕ່​ທ່ານ​ຮູ້​ບໍ່​ວ່າ​ຈະ​ຕ້ອງ​ຖ່າຍ­ໜັກ​ວັນ​ລະ​ຈັກ​ເທື່ອ​ຈິ່ງ​ຖື​ວ່າ​ສຸ­ຂະ­ພາບ​ດີ?.

ນັກ­ວິ­ຊາ­ການ​ລະ­ບຸ​ວ່າ ຈຳ­ນວນ​ເທື່ອ​ໃນ​ການ​ຖ່າຍ­ໜັກ​ຕໍ່​ວັນ​ແມ່ນ​ຂຶ້ນ​ຢູ່​ກັບ​ປະ­ລິ­ມານ​ອາ­ຫານ​ທີ່ເຮົາ​ກິນ-ດື່ມ​ເຂົ້າ​ໄປ ສ່ວນ​ປັດ​ໄຈ​ທີ່​ຄວນ​ສັງ­ເກດ​ກໍ​ຄື ລັກ­ສະ­ນະ​ຂອງ​ອາ­ຈົມ ຖ້າ​ຫາ​ກວ່າ​ບໍ່​ແຫ້ງ ບໍ່​ແຂງ ບໍ່​ໜຽວ ຫຼື ບໍ່​ມີ​ສີ​ທີ່​ຜິດ​ປົກ­ກະ­ຕິ ກໍ​ສັນ­ນິ­ຖານ​ໄດ້​ວ່າ ພຽງ​ຖ່າຍ­ໜັກ​ວັນ​ລະ 1 ເທື່ອ​ກໍ​ພຽງ​ພໍ­ແລ້ວ.

ປັດ​ໄຈ​ໃນ​ການ​ຂັບ​ຖ່າຍ​ຂອງ​ແຕ່­ລະ­ຄົນ​ທີ່​ເຮັດ​ໃຫ້​ຈຳ­ນວນ​ການ​ຖ່າຍ­ໜັກ​ໃນ​ແຕ່​ລະ​ວັນ​ບໍ່​ເທົ່າ​ກັນ ແມ່ນ​ຂຶ້ນ​ຢູ່​ກັບ​ປະ­ລິ­ມານ​ນ້ຳ​ດື່ມ​ຄື ຍິ່ງ​ດື່ມ​ຫຼາຍ​ກໍ​ຍິ່ງ​ຖ່າຍ​ຫຼາຍ​ເທື່ອ ຫຼື ຖ່າຍ​ງ່າຍ​ຂຶ້ນ ອີກ​ທັງ​ປັດ​ໄຈ​ດ້ານ​ໄວ​ອາ­ຍຸ​ທີ່​ຫຼາຍ​ຂຶ້ນ​ກໍ​ອາດ​ເຮັດ​ໃຫ້­ການ​ຂັບ​ຖ່າຍ​ຍາກ​ຂຶ້ນ  ຂະ­ນະ​ທີ່​ກິດ­ຈະ­ກຳ​ໃນ​ແຕ່​ລະ​ວັນ​ຊຶ່ງ​ຖ້າ​ຫາກ​ທ່ານ​ລຸກ​ຍ່າງ​ໄປ-ມາ ລວມ​ເຖິງ​ການ​ອອກ­ກຳ­ລັງ​ກາຍ­ເປັນ​ປະ­ຈຳ​ກໍ​ຈະ​ຊ່ວຍ​ໃຫ້​ຂັບ​ຖ່າຍ​ສະ­ດວກ​ຂຶ້ນ ລວມ​ເຖິງ​ປັດ​ໄຈ​ດ້ານ​ການ​ຮັບ​ປະ­ທານ​ອາ­ຫານ ຖ້າ​ຫາກ​ກິນ​ຜັກ ແລະ​ໝາກ​ໄມ້​ໜ້ອຍ ຫຼື ປະ­ລິ­ມານ​ອາຫານ​ທີ່​ກິນ​ເຂົ້າ​ໄປ​ໜ້ອຍ​ກໍ​ມີ​ຜົນ​ຕໍ່​ການ​ຂັບ​ຖ່າຍ​ເຊັ່ນ​ກັນ ອີກ​ທັງ​ປະ­ຫວັດ​ການ​ປິ່ນ­ປົວ​ບາງ​ພະ­ຍາດ ​ກໍອາດ​ສົ່ງ​ຜົນ​ກະ­ທົບ​ຕໍ່​ລະ­ບົບ​ຂັບ​ຖ່າຍ ເຮັດ​ໃຫ້​ເກີດ​ການ​ລະ​ຄາຍ​ເຄືອງ ແລະ​ທາງ​ເດີນ​ອາ­ຫານ​ບວມ ໄປ​ຈົນ​ເຖິງ​ພະ­ຍາດ​ລຳ​ໄສ້​ໃຫຍ່​ອັກ­ເສບ​ຊະ­ນິດ​ເປັນ​ບາດ­ແຜ ຫຼື ໄວ​ຣັ​ສລົງ​ກະ­ເພາະ​ອາ­ຫານ.

ຢ່າງ­ໃດ​ກໍ​ດີ ມີ​ການ​ສຳ​ຫຼວດ​ດ້ານ​ສຸ­ຂະ­ພາບ​ພົບ​ວ່າ ຄົນ​ສ່ວນ​ໃຫຍ່​ຈະ​ຂັບ​ຖ່າຍ​ປະ­ມານ 3 ເທື່ອ​ຕໍ່​ວັນ​ຈົນ​ເຖິງ 3 ເທື່ອ​ຕໍ່​ອາ­ທິດ ຫຼື ປະ­ມານ 2 ວັນ​ຕໍ່ 1 ເທື່ອ ຖ້າ​ຫາກ​ຖ່າຍ­ໜັກ​ເກີນ​ກວ່າ 3 ເທື່ອ​ຕໍ່​ວັນ ຫຼື ໜ້ອຍ​ກວ່າ 3 ເທື່ອ​ຕໍ່​ອາ­ທິດ​ກໍ​ອາດ​ຖື​ວ່າ​ມີ​ຄວາມ​ຜິດ​ປົກ­ກະ­ຕິ  ສ່ວນ​ການຖ່າຍ­ໜັກ​ທີ່​ເອີ້ນ​ວ່າ​ປົກ­ກະ­ຕິ ກໍ​ຕ້ອງ​ສັງ­ເກດ​ລັກ­ສະ­ນະ​ຂອງ​ອາ­ຈົມ​ດັ່ງ​ທີ່​ຍົກ​ມາ​ຂ້າງ​ເທິງ ແຕ່​ຖ້າ​ຖ່າຍ­ໜັກ​ຫຼາຍ​ກວ່າ 4 ເທື່ອ​ຕໍ່ 1 ວັນ (ຖ່າຍ​ຍາກ) ຄວນ​ແກ້​ບັນ­ຫາ​ດ້ວຍ​ການ​ດື່ມ­ນ້ຳ​ໃຫ້​ຫຼາຍ ຮັບ​ປະ­ທານ​ຜັກ ແລະ​ໝາກ​ໄມ້ ລວມ​ທັງ​ການ​ອອກ­ກຳ­ລັງ​ກາຍ​ເຊັ່ນ ແລ່ນເຕັ້ນ​ແອ​ໂຣ​ບິກ ຂີ່​ລົດ­ຖີບ ກໍ​ຈະ​ຊ່ວຍ​ລຳ​ໄສ້​ໃຫຍ່​ເຮັດ​ວຽກ​ໄດ້​ດີ ແລະ​ຊ່ວຍ​ລຳ­ລຽງ​ອາຈົມ​ອອກ​ຜ່ານ​ທະ­ວານ​ໜັກ​ໄດ້​ດີ​ຂຶ້ນ.

loading...

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.