ຄຳ​ມ່ວນ ສະ­ກັດ​ຈັບ​ເຄືອ​ຂ່າຍ​ຄ້າ​ຢາ​ບ້າ ໄດ້​ພ້ອມ​ຂອງ​ກາງ 30 ພັນ​ເມັດ

ເຈົ້າ​ໜ້າ­ທີ່​ພະ​ແນກ​ຕຳ­ຫຼວດ​ສະ­ກັດ​ກັ້ນ ແລະ ຕ້ານ​ຢາ​ເສບ​ຕິດ ແຂວງ​ຄຳ​ມ່ວນ ໄດ້​ນຳ​ກຳ­ລັງ​ເຂົ້າ​ຈັບ​ກຸມ​ຜູ້​ລັກ­ລອບ​ຊື້-ຂາຍ​ຢາ​ເສບ​ຕິດ​ປະ­ເພດ​ຢາ​ບ້າ ໄດ້ 2 ຄົນ ພ້ອມ​ຂອງ​ກາງ​ຢາ​ບ້າ 30.000 ເມັດ ຂະ­ນະ​ທີ່​ພວມ​ເຄື່ອນ​ໄຫວ​ຊື້-ຂາຍ​ຢູ່​ແຄມ​ທາງ​ທາງ​ເລກ​ທີ 13 ໃຕ້ ເຂດ​ບ້ານ​ເລົ່າ​ຄາ ເມືອງ​ຫີນ​ບູນ ແຂວງ​ຄຳ​ມ່ວນ.

ລາຍ​ງານ​ຂ່າວ​ຂອງ​ກຳ­ລັງ​ປ້ອງ​ກັນ​ຄວາມ​ສະ­ຫງົບ​ເມື່ອ​ອາ­ທິດ​ທີ່​ຜ່ານ​ມາ​ໃຫ້​ຮູ້​ວ່າ ພາຍ­ຫຼັງ​ໄດ້​ສືບ​ຮູ້​ວ່າ​ໃນ​ວັນ​ທີ 10 ມັງ­ກອນ 2018 ຈະ​ມີ​ກຸ່ມ​ຄົນ​ບໍ່​ດີ​ຈຳ­ນວນ​ໜຶ່ງ​ລັກ­ລອບ​ເຄື່ອນ​ໄຫວ​ນຳ​ສົ່ງ​ຢາ​ເສບ​ຕິດ​ປະ­ເພດ​ຢາ​ບ້າ ຢູ່​ແຄມ​ທາງ​ເລກ​ທີ 13 ໃຕ້ ຂອບ​ເຂດ​ບ້ານ​ເລົ່າ​ຄາ ເມືອງ​ຫີນ​ບູນ ດັ່ງ­ນັ້ນ ເຈົ້າ​ໜ້າ­ທີ່​ຕຳ­ຫຼວດ​ວິ­ຊາ​ສະ­ເພາະ ຈິ່ງ​ໄດ້​ວາງ​ແຜນ​ເພື່ອ​ດຳ­ເນີນ​ການ​ສະ­ກັດ​ກັ້ນ ແລະ​ຕິດ­ຕາມ​ກວດ­ກາ​ເປົ້າ​ໝາຍ ມາ​ຮອດ​ເວ­ລາ 16:00 ໂມງ​ຂອງ​ວັນ​ດຽວ​ກັນ ຈິ່ງ​ພົບ​ເຫັນ​ຜູ້​ຕ້ອງ​ສົງ­ໄສ​ຂັບ​ຂີ່​ລົດ​ເກັງ​ສີ­ຂາວ ແລ່ນ​ມາ​ຈອດ​ຢູ່​ຈຸດ​ດັ່ງ­ກ່າວ ໄດ້​ປະ­ມານ 10 ນາ­ທີ ກໍ​ມີ​ຜູ້​ຂັບ​ຂີ່​ລົດ​ກະ­ບະ​ຣີ​ໂວ້ ສີ​ປອນ-ທອງ ແລ່ນ​ມາ​ຈອດ​ຢູ່​ຈຸດ​ນັດ​ໝາຍ ແລ້ວ​ມີ​ຜູ້​ຊາຍ 2 ຄົນ​ຍ່າງ​ລົງ​ໄປ​ຫາ​ລົດ​ຣີ​ໂວ້​ຄັນ​ດັ່ງ­ກ່າວ ເພື່ອ​ເອົາ​ຢາ​ບ້າ​ສົ່ງ​ໃຫ້​ຜູ້​ຂັບ​ຂີ່​ລົດ​ເກັງ ແລະ​ໃນ​ຂະ­ນະ​ທີ່​ພວກ​ກ່ຽວ​ກຳ­ລັງ​ຊື້-ຂາຍ​ຢາ​ເສບ​ຕິດ​ກັນ​ຢູ່​ນັ້ນ ເຈົ້າ​ໜ້າ­ທີ່​ຕຳ­ຫຼວດ​ວິ­ຊາ​ສະ­ເພາະ ກໍ​ສະ­ແດງ​ຕົວ​ເຂົ້າ​ຈັບ​ກຸມ ຊຶ່ງ​ສາ­ມາດ​ຈັບ​ຕົວ​ເປົ້າ​ໝາຍ​ໄດ້ 2 ຄົນ ຊື່​ທ້າວ ໝັ້ນ ອາ­ຍຸ 43 ປີ ຢູ່​ບ້ານ​ຫ້ວຍ​ໄຮ ແລະ​ທ້າວ ຈ່ອຍ ອາ­ຍຸ 28 ປີ ອາ­ຊີບ​ຄ້າ­ຂາຍ ທັງ​ສອງ​ຢູ່​ເມືອງ​ປາກ​ກະ­ດິງ ແຂວງ​ບໍ​ລິ​ຄຳ​ໄຊ ພ້ອມ​ຂອງ​ກາງ​ຢາ​ບ້າ​ຈຳ­ນວນ 15 ມັດ ເທົ່າ​ກັບ 30.000 ເມັດ ແລະ​ລົດ​ກະ­ບະ​ຣີ​ໂວ້ ສີ​ປອນ-ທອງ 1 ຄັນ ສ່ວນ​ຜູ້​ທີ່​ຮັບ​ຊື້​ແມ່ນ​ໄດ້​ເອົາ​ຕົວ​ຫຼົບ­ໜີ.

ຜ່ານ​ການ​ສືບ­ສວນ​ໂດຍ​ເຈົ້າ​ໜ້າ­ທີ່ ຊຶ່ງ​ທ້າວ ໝັ້ນ ແລະ​ທ້າວ ຈ່ອຍ ໄດ້​ຮັບ​ສາ­ລະ­ພາບ​ວ່າ ຢາ​ບ້າ​ຈຳ­ນວນ​ດັ່ງ­ກ່າວ​ແມ່ນ​ຂອງ​ພວກ​ກ່ຽວ​ແທ້ ເພື່ອ​ຈະ​ນຳ­ໄປ​ສົ່ງ​ໃຫ້​ຜູ້​ສັ່ງ​ຊື້​ຊຶ່ງ​ນັດ​ກັນ​ຢູ່​ແຄມ​ທາງ​ເລກ​ທີ 13 ໃຕ້ ຂອບ​ເຂດ​ບ້ານ​ເລົ່າ​ຄາ ເມືອງ​ຫີນ​ບູນ ແຕ່​ພໍ​ໄປ​ເຖິງ​ຈຸດ​ນັດ​ພົບ​ກໍ​ຖືກ​ເຈົ້າ​ໜ້າ­ທີ່​ຕຳ­ຫຼວດ​ຈັບ​ຕົວ​ໄດ້​ກ່ອນ ພ້ອມ​ຂອງ​ກາງ​ຢາ​ບ້າ​ຈຳ­ນວນ​ດັ່ງ­ກ່າວ.

ປະ­ຈຸ​ບັນ ທາງ​ເຈົ້າ​ໜ້າ­ທີ່​ຕຳ­ຫຼວດ​ກຳ­ລັງ​ດຳ­ເນີນ​ການ​ສືບ­ສວນ-ສອບ​ສວນ​ຂະ­ຫຍາຍ​ຜົນ​ຫາ​ກຸ່ມ​ແກ້ງ​ຜູ້​ຮ່ວມ​ຂະ​ບວນ​ການ​ມາ​ດຳ­ເນີນ​ຕະ​ດີ​ຕາມ​ຂັ້ນ​ຕອນ​ຂອງ​ກົດ­ໝາຍ​ຕໍ່​ໄປ.

ທີ່ມາ: ນສພ ວັນອາທິດ

loading...

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.