ຕ້ານພະຍາດອາດຍາສິດ

ຕ້ານພະຍາດອາດຍາສິດ

ຕ້ານພະຍາດອາດຍາສິດ

ຈື່ໄດ້ວ່າຢູ່ໃນປຶ້ມຂຽນໂດຍ XY2 ຊຶ່ງເປັນນາມປາກກາຂອງ ທ່ານ ໂຮ່ຈີມິນ ປຶ້ມແກ້ໄຂວິທີເຮັດວຽກນັ້ນ ແມ່ນໄດ້ເວົ້າເຖິງຫຼາຍພະຍາດເຊັ່ນ: ພະຍາດເປັນແຕ່ປາກ, ພະຍາດທິດສະດີນ້ຳເຕົ້າເປົ່າ ແລະ ມີພະຍາດອາດຍາສິດຢູ່ນຳຊຶ່ງເປັນພະຍາດທີ່ຮ້າຍແຮງຕ້ອງໄດ້ ກຳຈັດຖິ້ມບໍ່ໃຫ້ເກີດໃນຕົວບຸກຄົນ ແລະ ໜ່ວຍງານເພາະພະຍາດນີ້ມີແຕ່ຈະເກີດຜົນເສຍແກ່ສ່ວນລວມ ຢ່າງດຽວເຊັ່ນ: ມີພຶດຕິກຳສໍ້ລາດ ບັງຫຼວງ. ສ້າງຫຼາຍວິທີການເພື່ອຫາຜົນປະໂຫຍດໃສ່ຕົວເອງ, ເມື່ອເຮົາໄປຟັງການເຜີຍແກ່ເອກະສານສຳຄັນຂອງພັກ-ລັດ ກໍມັກຈະໄດ້ຍິນການເວົ້າເຖິງການກຳຈັດພະຍາດອາດຍາສິດນີ້.

ເຖິງແມ່ນວ່າບ້ານເຮົາຈະມີກົດໝາຍ ວ່າດ້ວຍການຕ້ານການສໍ້ລາດບັງຫຼວງອອກມາຮັບໃຊ້ສັງຄົມດົນແລ້ວກໍຕາມແຕ່ຖ້າທ່ານໃດຕິດຕາມຂ່າວສານບ້ານເມືອງກໍຈະໄດ້ຮູ້ກ່ຽວກັບຂ່າວທີ່ເປັນປະກົດການຫຍໍ້ທໍ້ຂອງເຈົ້າໜ້າທີ່, ພະນັກງານຂອງລັດທີ່ເຫັນແກ່ຜົນປະໂຫຍດສ່ວນຕົວຫຼາຍກວ່າສ່ວນລວມຊຶ່ງຕົກຢູ່ໃນລັກສະນະພຶດຕິກຳສໍ້ລາດບັງຫຼວງຜູ້ຂຽນຈິ່ງຂໍນຳສະເໜີພຶດຕິກຳສໍ້ລາດບັງຫຼວງທີ່ຂຽນໄວ້ໃນກົດໝາຍດ້ານການສໍ້ລາດບັງຫຼວງມາດຕາ 10 ເວົ້າໄວ້ວ່າ: ຍັກຍອກຊັບສົມບັດຂອງລັດ ຫຼື ລວມໝູ່, ການສໍ້ໂກງຊັບຂອງລັດ ຫຼື ລວມໝູ່, ການຮັບສິນ ບົນ, ສວຍໃຊ້ຖານະຕຳແໜ່ງ, ສິດອຳນາດ, ໜ້າທີ່ ເພື່ອເອົາຊັບຂອງ ລັດ ຫຼື ລວມໝູ່ ການໃຊ້ອຳນາດເກີນຂອບເຂດ, ການລັກລອບປອມ ແປງເອກະສານ ຫຼື ການໃຊ້ເອກະສານປອມ, ການກົດໜ່ວງຖ່ວງດຶງເອກະສານຊຶ່ງລາຍລະອຽດແມ່ນໄດ້ຂຽນໄວ້ລະອຽດຜູ້ຂຽນພຽງສະເໜີເພື່ອໃຫ້ສັງຄົມໄດ້ຮູ້ນຳກັນ ຫຼື ບໍ່ດ່ັງນັ້ນ ຜູ້ສົນໃຈເລິກກໍສາມາດຫາກົດໝາຍສະບັບນີ້ມາກ່າວຕື່ມກໍໄດ້, ໃນໝວດທີ 3, ມາດຕາ 22 ແມ່ນເນັ້ນເຖິງມາດຕະການສະກັດກັ້ນການສໍ້ລາດບັງຫຼວງວ່າພະນັກງານທຸກຂັ້ນເປັນຕົ້ນພະນັກງານການນຳຕ້ອງເປັນແບບຢ່າງໃນການປະຕິບັດລະບຽບກົດໝາຍຢ່າງເຂັ້ມງວດດຳລົງຊີວິດຢ່າງປອດໃສຂາວສະອາດບໍ່ສໍ້ລາດບັງຫຼວງ.

ເມື່ອເວົ້າເຖິງພະຍາດອາດຍາສິດຈິດຕະສາດຂອງສັງຄົມກໍຈະມັກໄດ້ຍິນໂລດວ່າພວກໃຊ້ອຳນາດບາດໃຫຍ່ເກີນຂອບເຂດຊຶ່ງຢູ່ໃນລັກສະນະກໍໃຫ້ເກີດຄວາມຮູ້ສຶກ ແລະ ເຢັນຊາຕໍ່ການຫຍໍ້ທໍ້ໃນທາງດ້ານລົບ, ທ່ານ ເຈືອງ ສົມ ບູນຂັນ ໄດ້ຂຽນໄວ້ໃນວາລະສານອາລຸນໃໝ່ ສະບັບທີ 4 ທັນວາ 1990 “ວ່າ: ອາດຍາສິດແມ່ນສັດຕູຂອງປະຊາຊົນ, ອາດຍາສິດ ແມ່ນພວກທີ່ດຶງຜົນປະໂຫຍດຂອງລັດລົງມາຢູ່ໃນລະດັບວຽກງານສ່ວນຕົວຂອງຕົນເອງ, ແຍກມະຫາຊົນອອກຈາກການປະກອບສ່ວນໃນຊີວິດຂອງລັດ. ດັ່ງນັ້ນອາດຍາສິດຈຳນວນໜຶ່ງ ຈິ່ງຊອກ ຫາທຸກວິທີເພື່ອສວຍໃຊ້ຫຼົບຫຼີກພັນທະຢ່າງແນບນຽນ, ເກີດລັດທິອັດຕະປະໂຫຍດລັດທິເຫັນແກ່ໂຕແບບເປັນໝູ່ຄະນະ, ລໍ້າລວຍ, ຮັ່ງມີຢ່າງໄວວາ, ແບບບໍ່ໜ້າເຊື່ອ” ທີ່ສະເໜີມາທັງໝົດເປັນບັນຫາທີ່ເລັງທວງໃຫ້ມີການແກ້ໄຂຢ່າງເດັດຂາດ ແລະ ໄວວາ, ສະເໜີເພື່ອເປັນການແລກປ່ຽນນຳກັນ!.

ໂດຍ: ດັ້ນກີບເມກ

loading...

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *

This site uses Akismet to reduce spam. Learn how your comment data is processed.

ຫມວດຫມູ່

Copy Protected by Chetan's WP-Copyprotect.